Rusia nisi valën e saj më të madhe të sulmeve me raketa në qytetet ukrainase në më shumë se një muaj, disa orë pasi presidenti ukrainas Volodymr Zelensky propozoi një plan paqeje përpara liderëve botërorë në samitin e G20 në Indonezi.
Sirenat e sulmit ajror u dëgjuan në të gjithë Ukrainën menjëherë pasi udhëheqësi i saj përshkroi një plan prej 10 pikash, duke përfshirë tërheqjen e trupave ruse dhe rivendosjen e integritetit territorial të Ukrainës.
Sulmet kishin në shënjestër infrastrukturën e energjisë në disa rajone të vendit, duke lënë më shumë se shtatë milionë ukrainas pa energji elektrike dhe furnizimin me energji elektrike në një gjendje kritike, sipas zyrtarëve të lartë ukrainas.
Nënkryetari i Zyrës Presidenciale të Ukrainës, Kyrylo Tymoshenko, tha se 15 objekte të infrastrukturës energjetike të Ukrainës ishin dëmtuar gjatë sulmeve raketore ruse, por mbrojtja ajrore ukrainase kishte rrëzuar 70 nga më shumë se 90 raketa të lëshuara në Ukrainë.
Të paktën një duzinë qytetesh dhe rrethe u shënjestruan, sipas një analize të CNN të sulmeve me raketa. Vala e sulmeve duket të jetë më e madhja që nga 10 tetori, kur Rusia rriti fushatën e saj për të shkatërruar infrastrukturën e energjisë elektrike, ujit dhe gazit në të gjithë Ukrainën.
Dy raketa raportohen se kanë goditur një fermë në Poloni pranë kufirit me Ukrainën, duke vrarë dy persona, sipas mediave polake. Është e paqartë se nga erdhën predhat, por ato u ulën afërsisht në të njëjtën kohë me një sulm raketor rus në Ukrainën perëndimore.
Mediat thonë se sulmi mbi Kiev ishte një hakmarrje e Moskës për dështimin e turpshëm në qytetin e Khersonit.
/a.r
