Daljen jashtë kontrollit të zjarreve kreu i Emergjencave Civile, Haki Çako, ua faturon drejtuesve të bashkive. Në një intervistë për Tv Klan, Çako thotë se shumë prej bashkive nuk kanë ngritur infrastrukturën e duhur për ndërhyrje, siç parashikon ligji për mbrojtjen civile.
“Përgjegjësia bazë është e bashkive për të menaxhuar situatën dhe parandaluar atë. Mbi bazë të ligjit për mbrojtjen civile. Ata duhet të vendosin në prioritet absolut për investime për parandalimin e fatkeqësive natyrore si fenomen të cilët e vendosin për fatin tonë të keq në vendet më të ekspozuara. Një pjesë e bashkive ende nuk kanë krijuar strukturat në bazë të këshillit ministrave dhe ligjit për mbrojtjen civile. Pothuajse shumica e bashkive duhet ta kthejnë vëmendjen dhe interesin tek kjo fushë përgjegjësie”.
Shumica e zonave me risk të lartë kanë qenë në Vlorë, Gjirokastër, Kukës dhe Lezhë. Ndërsa aktualisht mbetet zona në veri të vendit.
“Mbetet në pikëpyetje zona e Lezhës, Pukës dhe Kukësit”.
Autoritet ende nuk kanë një shifër për sipërfaqen e djegur në dy javë intensive me zjarresh nga veriu në jug. Çako thotë se prefektët e çdo qarku duhet të fillojnë të bëjnë bilancin e dëmeve.
“Duke qenë se zjarret kanë përfshirë shumicën e qarqeve dhe bashkive është përgjegjësi e bashkive të dëmeve operative, por do abuzoheshim nëse do jepeshin përcaktime konkrete më këto momente”.
Në operacionet për shuarjen e zjarreve u përdorën helikopterë të Mbrotjes Civile, dhe ata nga Holanda dhe Çekia. Grupi operacional holandez do vijojë të qëndrojë edhe për një javë në Shqipëri, pasi sipas Çakos situata mbetet ende kritike.
Zonat me risk më të lartë kanë qenë qarku i Vlorës, qarku i Gjirokastrës, por edhe zona të tjera të cilat të cilat u mbingarkuan me vatra zjarri të njëpasnjëshme si Kukësi dhe Lezha.
/a.r
