Këtë të martë, më 14 prill, u zhvillua seanca e parë në Gjykatën e Posaçme për hakerimin e emaileve të prokurorëve të SPAK-ut, e cila u vendos të shtyhej në një datë të mëvonshme këtë muaj.
Gazetarja e Klan News Glidona Daci raporton se janë paraqitur të tre të pandehurit, mes të cilëve ish drejtori i Burgjeve, Agim Ismailaj.Avokatët e Agim Ismailit kërkuan që të njihen me vendimin e gjyqtarit të seancës paraprake, duke thënë se “nuk na është vënë në dispozicion ai vendim. Ne kërkojmë që të ndërpritet kjo seancë në mënyrë që të njihemi me vendimin”.
Edhe përfaqësuesit e SPAK-ut ranë dakord që të pranohet kërkesa e të pandehurit sa i takon vënies në dispozicion të vendimit, por kërkuan të pezullohen afatet e paraburgimit për të pandehurit.
Pas një konsultimi, gjykata vendosi që të pranojë kërkesën e mbrojtes në mënyrë që t’i vihet në dispozicion vendimi i seancës paraprake.
Gjykata po ashtu vendosi të pezullojë afatet e paraburgimit deri në seancën e radhës duke qënë se shkak për shtyjen e seancës u bë kërkesa e tyre. Seanca e radhës do të zhvillohet më 27 prill, ora 11:00.
