Kryeministri Edi Rama ka artikuluar akuza të forta ndaj Prokurorisë së Krimeve të Rënda pas kapjes së sasisë rekord të kokainës në Durrës e cila sipas shefit të qeverisë është histori që nuk nis këtu.
Duke folur në Kuvend një ditë pas shkarkimit të Besim Hadarmataj nga kreu i Krimeve të Rënda, Rama tha se historia e kokainës së kapur së fundi nuk ka nisur dje dhe arrestimi i Arbër Cekaj është i lidhur me një histori që ka filluar më parë, dhe të cilën prokuroria e krimeve të rënda duhet ta kishte hetuar më parë.
Më tej kryeministri tha se e vërteta e lidhur me trafikun e kokainës, me operacionin që çoi në pranga një eksponent të rëndësishëm por jo te vetmin e trafikut, me taposjen e kanalit të hetimeve nga prokuroria e krimeve të rënda do dali mund të vonojë por do të dalë.
“Një gjë desha t’ju them këtyre dhe po jua them sot shqiptarëve: çështja e kokainës, se këtyre iu ka mbirë kokaina në gojë, tani që lufta me kanabisin është histori, i takon të shkuarës; çështja e kokainës është problem i këtyre.
Kjo nuk është pjesë e asaj politikës kush të shajë më shumë e kush të akuzojë më shumë sepse historia e kokainës së kapur së fundmi nga ne, nga agjencitë tona ligjzbatuese nuk ka filluar dje dhe arrestimi i atij personit është i lidhur me një histori që ka filluar më parë dhe të cilën Prokuroria e Krimeve të Rënda duhet ta kishte hetuar më parë.
Por ne nuk jemi si këta, ne nuk marrim informacione me copa letrash nga institucionet dhe të dalim këtu të bëjmë gjyqin e tyre.
Ne presim, ne kemi durim të madh për të mbajtur dhe për të thënë me gjithë koston e madhe perceptimit të opinionit se këtu jemi të gjithë njësoj se këtu jo vetëm jemi të gjithë njësoj por këtu problemi na qenka kjo qeveri, kjo shumicë. U mboll si farë në 2013, u rrit, u korr u trafikuar në kohën tonë.
Ne hapëm luftën që këta dhe askush para nesh nuk guxonte ta hapte. Ne e nxorëm fenomenin nga errësira në dritë. Morëm dhe kostot, patëm sukseset dhe dështimoret tona por unë kam shumë besim që e vërteta vonon, vonon, por nuk harron.
E vërteta e lidhur me trafikun e kokainës, me operacionin që çoi në pranga një eksponent të rëndësishëm por jo të vetëm të këtij trafiku, e vërteta e lidhur me taposjen e kanalit të hetimeve nga Prokuroria e Krimeve të Rënda për këtë çështje do dali”– tha Rama.
a.ç
