Komisioneri Hahn i ka bërë thirrje opozitës që të votojë ligjin për magjistratët, i cili i hap rrugë emërimeve të reja në drejtësi dhe zëvendësimit të gjyqtarëve dhe prokurorëve të korruptuar që janë larguar nga sistemi i drejtësisë dhe kanë krijuar ngërç në gjykata.
Gjatë takimit me kryeministrin Edi Rama dhe ministrat, Hahn deklaroi se do ishte katastrofë nëse vendi do ngelej pa gjyqtarë si rezultat i vettingut
“Është detyrë e qeverisë dhe e opozitës që të zbatojnë shpejt reformën në drejtësi. Është ironike që si rezultat i vetingut të hasni një situatë që mos të kemi gjyqtarë. Kjo do ishte katastrofë”, tha Hahn.
Ai kërkoi shtimin e numrit të studentëve në magjistraturë.
“Unë sot e mësova se juve edhe për të shtuar studentë në magjistraturë, duhet të vendosni me 2/3-at. Kjo në fakt nuk më duket aspak normale, pasi duhet hapur rruga që të shtohet prokurorët e gjyqtarët që do të përfshihen në sistemin e drejtësisë në vend dhe do të çojnë përpara reformën e nisur tashmë”, tha Hahn.
Kujtojmë se ligji për magjistratët kërkon 84 vota, të cilat maxhoranca nuk i ka e vetme.
Javën e kaluar Kuvendi futi në rend dite ligjin, por opozita bojkotoi seancën nga frika e rrjedhjes së votave.
Ky veprim e pozicionoi opozitën edhe një herë kundër reformës në drejtësi.
Të enjten projektligji pritet të futet sërish në rend dite, ndërsa nuk dihe ende cili do jetë qëndrimi i opozitës
Javanews/a.ç
