Gjykata Speciale ka arrestuar të enjten edhe ish-Ministrin e Drejtësisë nga radhët e Partisë Demokratike të Kosovës (PDK), Hajredin Kuçi.
Ky është arrestimi i katër që Specialja e ka bërë mëngjesin e së enjtes, pasi që paraprakisht është arrestuar ish-Komandanti i Ushtrisë Çlirimtare të Kosovës (UÇK), Isni Kilaj, ish-shefi e Agjencisë Kosovare të Inteligjencës (AKI), Bashkim Smakaj dhe Fadil Fazliu, vëllai i dy heronjve, Fahri e Bahri Fazliu
Kuçi ka qenë pjesëtar i ekipit mbrojtës të ish-Kryetarit të Kuvendit, Kadri Veseli, në procesin gjyqësor në Speciale, ku po akuzohet për krime të pretenduara lufte.
Në lidhje me këto arrestime, ka reaguar edhe Zyra e Prokurorit të Specializuar (ZPS), ku ka theksuar se është duke kryer operacione të vazhdueshëm në Kosovë.
Përmes një komunikate për media të enjten, ZPS-ja ka thënë se operacionet kanë të bëjnë me veprat kundër administrimit të drejtësisë, pa dhënë detaje shtesë.
“Zyra e Prokurorit të Specializuar (ZPS) po kryen operacione të vazhdueshme në Kosovë në një hetim që fokusohet në veprat kundër administrimit të drejtësisë. Operacionet e ZPS-së janë autorizuar gjyqësorisht nga Dhomat e Specializuara të Kosovës (DSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, thuhet në njoftimin e ZPS-së.
Lajmi për arrestimin e Kilajt dhe Smakajt është konfirmuar për mediat në Prishtinë edhe nga familjarët e tyre.
Ndërsa, arrestimin e Fazliut e ka konfirmuar djali i tij, Fahri Fazliu, përmes një postimi në Facebook.
“Sot, paradite rreth orës 8:00 të mëngjesit para banesës së tij kanë arrestuar babain tim, Fadil Fazliun, luftëtarin e UÇK-së, vëllain e dy heronjve të kombit, Fahri e Bahri Fazliu”, shkroi Fazliu.
Ai theksoi se me urdhër të Dhomave të Specializuara të Hagës është arrestuar dhe pritet të dërgohet për në Hagë.
“Ballëhapur, kokëlart dhe gjithmonë krenar me të kaluarën tonë të lavdishme! Krenar me ty Bablok”, shtoi.
Ndryshe, Isni Kilaj ishte arrestuar edhe në nëntor të 2023, nën dyshimin se ka kryer veprën penale “pengim të drejtësisë”. Kilaj ishte liruar në maj.
Po vitin e kaluar, nga Gjykata Speciale ishin bastisur shtëpitë e Smakajt dhe Fazliut.
Në lidhje me këto arrestime, ka reaguar ushtruesi i detyrës së kryetarit të Organizatës së Veteranëve të Luftës (OVL) të UÇK-së, Faton Klinaku.
“Gjykata Speciale po vazhdon gjahun ndaj UÇK-së dhe luftëtarëve të lirisë”, ka shkruar Klinaku në Facebook.
/a.r
