Deputetja Mimoza Hafizi, e njohur si kritike e kryeministrit rama dhe mbështetëse e Ben Blushit, ka hedhur hije dyshimi mbi Referendumin e zhvilluar nga Partia Socialiste. Hafizi, shkruan në Facebook se procesi u manipulua dhe se për vërtetimin e shkeljeve ka kërkuar të njihet me listat e votuesve në 385 qendra votimi.
Hafizi paralajmëroi një fushatë të gjerë në të gjithë vendin së bashku me dpeutetin Blushi, për t’i treguar socialistëcve siç shprehet ajo se si emrat e tyre janë abuzuar.
Ja postimi i Hafizit:
Ne i ftuam socialistët t’i thonë “Jo” këtij procesi, me argumente të zhvilluara përgjatë 3 javëve pas Kongresit. Si të tillë, ne ishim alternativa referendare.
Në Kodin Zgjedhor të Partisë, neni 55.6, si alternativë referendare ne kishim të drejtën e vëzhgimit të procesit. E kemi kërkuar që në ditën e parë, publikisht. Një ditë para referendumit, unë kam ndjekur gjithkund Komisionin Zgjedhor të Partisë Bashkia Shkodër, për t’i kërkuar akreditimin e vëzhguesve në 11 qendrat e votimit në këtë bashki. Komisioni është fshehur, është ndërruar në momentin e fundit, nuk më është përgjigjur. Për këtë kam dokumentim të plotë.
Ne nuk na u dha mundësia të kemi vëzhgues, për të shënuar se cilët ishin pjesëmarrësit realë në procesin e votimit. Në këto kushte, është detyrim ligjor që të na plotësohet kërkesa: të na vihen në dispozicion fotokopjet e të gjitha listave të pjesëmarrësve në procesin e votimit, me nënshkrimet e votuesve, në 385 qendrat e votimit të vendit. Kërkesën do ia parashtrojmë KZP, Komisionit Zgjedhor të Partisë, sapo ky komision të shpallë rezultatin e referendumit, kuti për kuti, ashtu siç e kërkon Kodi Zgjedhor i Partisë. Me këto lista në dorë ne do shkojmë të kontaktojmë të gjithë socialistët shqiptarë, qytet më qytet e fshat më fshat, për t’iu treguar sesi emrat e tyre janë abuzuar dhe se sa i shëmtuar dhe i manipuluar ka qenë ky proces. Është detyra jonë morale para socialistëve dhe shqiptarëve.
