Teksa opozita përgatitet për protestën e nëntë kombëtare këtë të premte, duket se kësaj here do të ketë edhe mbështetjen e një deputeti të Kuvendit, i cili mori mandatin pas djegies në bllok të mandateve nga ana e opozitës.
Edhe pse vijon të mbajë mandatin e deputetit, Lefter Maliqi në studion e “Top Talk” e ka cilësuar si ilegjitim Kuvendin e Shqipërisë.
“Për mua ai Parlament është ilegjitim. Unë besoja se do të plotësoheshin 140 deputetë dhe u deklarova i pari. Ai Kuvend është me 121 mandate.
Jo vetëm që është me 121 mandate, por edhe votimi i fundit ku 100 deputetë votuan pro rezolutës, u tregua hapur pazari që u bë.
Të gjithë deputetët e opozitës ishin në sinkron për të qenë abstenim, përveç meje dhe 6 të tjerëve që votuan kundër rezolutës”, tha Lefter Maliqi.
I pyetur se përse vijon të jetë deputet, ai tha se aty është një zë kritik i kësaj qeverie. Ai madje deklaroi se këtë të premte do t’i bashkohet opozitës në protestë.
Por gjithësesi, Lulzim Basha më herët i ka cilësuar tradhtarë ata që pranuan mandatet. Ndërsa përmes kandidatit Indrit Hoxha dhuroi edhe shfaqje ‘teatrale’, kur ky i fundit e pranoi mandatin por refuzoi betimin.
