LEZHE-Hoxha i xhamisë së Lezhës kërkon rikthimin e dënimit me vdekje. Gjatë takimit ku i pranishëm ishte edhe ministri Xhafaj dhe ambasadorja e BE Vlahutin, ai kërkoi që të rikthehet dënimi me vdekje, pasi sipas tij do të zgjidhen shumë plagë sociale që kanë mbërthyer vendin.
“Shqipëria është rast i veçantë dhe në Europë duhet të pranohet si një rast i veçantë se nëse rikthehet dënimi me vdekje do të zgjidhen shumë plagë sociale që kanë mbërthyer vendin. Ne si komunitet mysliman do lobojmë në Parlament nëse jepet drita jeshile prej jush“, tha Hoxha.
Por ambasadorja e BE Vlahutin tha se BE nuk e pranon dënimin me vdekje.
“Ky është një sugjerim po duhet të dini që ka disa vlera themelore që do të thotë jeta e çdo njeriu duhet mbrojtur. Ka një shtet të së drejtës, një shtet që ne po përpiqemi shumë të ndihmojmë që të funksionojë. Dënimi me vdekje nuk pranohet nga BE”, deklaroi Vlahutin
a.ç
