Bashkia Sarande ka bërë sot një paralajmërim disi të çuditshëm, lidhur me fermerët të cilët mbarështojnë bagëti në zonat e banuara.
Përmes një postimi në profilin e saj në ‘Facebook’, Bashkia e Sarandës bën me dije se kjo nismë bëhet për të ndarë turizmin nga begatitë.
Mësohet se shumë qytetarë janë ankuar për këtë fenomen, duke bërë kështu që Bashkia e Sarandës të bëjë këtë paralajmërim të ashpër.
Postimi:
Njoftohen të gjithë qytetarët, banorë të Sarandës dhe Ksamilit, që mbarështojnë bagëti në këto territore, se Bashkia do të ndërmarrë veprime me tolerancë zero në zbatim të ligjit, për të ndarë përfundimisht turizmin nga bagëtitë.
Në çdo rast që do të kapen të imta dhe gjedhë jashtë regjimit stallor, në qendrat e banuara te këtyre territoreve, ato do të përfundojnë në thertore dhe mishi i tyre do të jepet për konsum falas në institucione sociale etj.
Është hera e fundit që mbarështuesit e bagëtive të imta apo gjedhë, porositen t’i mbajnë në regjim stallor, ose t’i tregtojnë ato apo t’i therin dhe t’i konsumojnë vetë, përpara se të sekuestrohen dhe çohen në thertore, përfundon postimi në fb i bashkisë Sarandë. /b.d
