Shpesh dëgjojmë prindërit apo të afërmit të na thonë që të konsumojmë sa më shumë fruta dhe perime të jetë e mundur. Por çfarë ndodh nëse frutat tuaja të preferuara nuk janë të sezonit aktual, apo perimet e blera doni t’i konsumoni ditë më vonë pas blerjes? Epo ndoshta është koha të nisim t’i përdorim këto produkte të ngrira.
Të ngrini produktet do të thotë që ju mund të shijoni frutat tuaja të preferuara si manaferrat ose pjeshkat, edhe gjatë periudhës së dimrit. Kjo do të thotë, më pak produkte të shkuara dëm, duke ju lejuar ta zgjidhni vetë kohën kur doni ta konsumoni ushqimin tuaj të preferuar.
Në fakt studimet kanë treguar se frutat dhe perimet e ngrira mund të kenë po aq shumë vitamina, madje në disa raste edhe më shumë, në krahasim me ato të freskëta.
“Përsa i përket mënyrave se si njerëzit ia dalin të ruajnë ushqimet, ngrirja e tyre del në krye për ruajtjen e lëndëve ushqyese. Nëse ju nuk mund ta përballoni ushqyerjen bio ose jetoni në zona ku nuk e keni dot të mundur konsumimin e produkteve të tilla, është e rëndësishme për njerëzit të dinë se ushqimet e ngrira janë një opsion shumë i mirë,” – thotë studiuesi Ali Bouzari.
Përveç ruajtjes së vitaminave, ngrirja është mënyra më e mirë për të ruajtur komponentët e dobishëm të bimëve, që ndihmojnë në mbrojtjen kundër sëmundjeve, shpjegoi Mary Ann Lila, drejtoreshë e Institutit për Shëndetin e Njerëzve në Universitetin Shtetëror të Karolinës së Veriut.
