Aktori i njohur Guljelm Radoja pasditen e sotme mori fjalën gjatë protestës te Teatri Kombëtar duke e cilësuar si turp atë për atë që ndodhi dje, ndërsa kundërshtoi marrëveshjen që u firmos mes disa aktorëve dhe Lulzim Bashës, pasi u shpreh kundër politizimit të cështjes.
Ai u shpreh se i përket të djathtës, pasi është një nga nismëtarët e krijimit të PD-së në Durrës, por kërkoi që të mos politizohet kauza.
‘Ata që kanë firmosur paktin, nuk e di, s’e kam lexuar se çfarë kanë bërë, por ai i gjati dhe ca të gjatë e të shkurtër të tjerë bënë atë që ne na përçanë.
Teatri është i depolitizuar, teatri është i qytetarëve dhe jo partive. Por unë iu them gjithë kolegëve të m’i që kanë mbetur, mos ta politizojmë kauzën tonë. Le të na mbështesin partitë politike. Ne jemi ne, teatri është teatër’ tha ai. Në fund të fjalës së tij, Radoja kishte një mesazh edhe për ata kolegë që sipas tij nuk i qëndruan kauzës duke shkelur mbi dinjitetin e tyre.
PD-ja nënshkroi marrëveshjen me Aleancën për Mbrojtjen e Teatrit. Marrëveshja u nënshkrua nga lideri demokrat Lulzim Basha dhe aktorë të Teatrit Kombëtar. Në disa pika të kësaj marrëveshjeje thuhet se një muaj pas ardhjes në pushtet të PD do të shfuqizohet ligji për shembjen e Teatrit dhe ky i fundit do të shpallet monument kulture.
Fjala e plotë e aktorit Guljelm Radoja
Meqë përfaqësoj Durrësin po them ca gjëra. Para ca kohësh dola në këtë pod dhe thashë edhe unë 3 fjalë dhe po më kujtohen tani. E para, ky vend nuk është i joni, ky vend është juaji. E dyta thashë me plot bindje se nuk do të fitojnë ata, do të fitojë qytetaria, do të fitojë ai spektator, ai qytetar që e do artin. Nuk po i hyj analizës, por ajo e djeshmja qe turpi më i madh. Ishte turpi i atyre që e bënë dhe vetë fakti që u zbythën (kërkoj ndjesë për fjalorin), tregoi se e kanë mbushur zullumin.
Tani dua të ngre një problem tjetër që më shqetëson. Çdo parti ka politikat e veta dhe do të fitojë kredibilitete me diçka, ngjarje, ndodhi. Unë i përkas kësaj të djathte, jam një nga nismëtarët e krijimit të PD-së në Durrës, por duke e parë veten në pasqyrë e pashë që unë nuk jam për politikë, vota ime shkon atje ku shkon por nuk më pëlqen që ne të bëhemi një tip kukulle që futemi në sqetullën e cilësdo aleancë, e cilësdo parti. Jo! Teatri është i depolitizuar, teatri është i qytetarëve dhe jo partive. Ata që kanë firmosur paktin, nuk e di, s’e kam lexuar se çfarë kanë bërë, por ai i gjati dhe ca të gjatë e të shkurtër të tjerë bënë atë që ne na përçanë.
90% dolën të majtë dhe ca kokrra dolën të djathtë. Ia arritën kësaj dite. Ia arriti sepse unë nuk do ta citoj, por do t’i referohem Shekspirit. Fatkeqësisht ne jemi karaktere të butë, karaktere që manipulohemi dhe kjo gjë vërtetoi katërcipërisht që ne jemi të manipulueshëm. Jemi ca kokëderra… Dikush nga kolegët e m’i, i tha dikujt ‘Unë shkela mbi dinjitetin tim’. Po pse shkele more mik? A ka gjë më të madhe se dinjiteti?
Secili prej nesh këtu kur lanë faqet në mëngjes sheh veten dhe thotë një fjalë; cfarë bëra dje, sa dinjitoz qesh dje, pse të isha qesharak dje? Unë që flas jam shumë i qetë, jam pensionist, kam 10 vjet në pension, i marr këtij shteti aq sa më jep. Pse u shite miku im? Pse u shite kolegu im? Çfarë pakti bërë me djallin ti që shkele mbi dinjitetin? Mirë njerëzor, po artistik? Ku është? Unë jam në Durrës, banoj në Durrës, vij rrallë këtu tek ju, por jam me ju. Por unë iu them gjithë kolegëve të m’i që kanë mbetur, mos ta politizojmë kauzën tonë. Le të na mbështesin partitë politike. Ne jemi ne, teatri është teatër, qytetarët e Tiranës, artëdashësit janë me ne.
/a.r
