Ishte një sherr i çastit banal nën efektin e alkoolit, por rezultoi fatal për jetën e një 53-vjeçari. Ngjarja u shënua në Vlorë në lagjen ’10 Korriku’, ditën e enjte, por pasojat erdhën më pas. Policia bën të ditur se më 10 Nentor 2016, rreth orës 13:20, në lagjen “10 Korriku”, shtetasi Viron Dukaj, pas një konflikti për motive të dobëta duke qenë nën efektin e pijeve alkolike, ka goditur me grusht të fortë në pjesën e fytyrës, shtetasin Th.Gj., 53 vjeç, banues në Vlorë, i cili ka rënë në tokë pa ndjenja.
Shtetasi i dëmtuar ka marrë ndihmën e parë mjekësore në Spitalin Rajonal dhe është kthyer në banesë (pa probleme). Në datë 11.11.2016, rreth orës 01:30, gjendja shëndetësore e tij në banesë është përkeqësuar dhe është dërguar nga familjarët në Spitalit Rajonal, por gjendja e tij është rënduar më shumë dhe rreth 1 orë më vonë, Spitali ka konfirmuar vdekjen e tij.
Policia arrestoi në flagrancë për veprën penale “Vrasje nga pakujdesia”, shtetasin: Viron Dukaj, 59 vjeç, banues në Vlorë. Ndërkaq po kryhen veprimet e mëtejshme proceduriale të kqyrjes së trupit të pajetë nëpërmjet autopsisë mjeko-ligjore.
