Ka nisur procesi gjyqësor në Gjykatën e Krimeve të Rënda ndaj Admir Tafilit, dhe pjesëtarëve të grupit të vrasësve me pagesë që drejtoheshin nga burgu nga Tafili.
Seanca e parë ka dështuar dhe shkak është bërë mungesa e kreut të grupit kriminal Admir Tafili dhe avokatëve të të 13 pandehurve të tjerë.
Ndërkohë, i pranishëm ishte i pandehuri Kristi Pine, i cili është me status të veçantë, atë të të penduarit.
Ai qëndronte i rrethuar nga forcat speciale, për të shmangur ndonjë hakmarrje të mundshme nga personat e tjerë.
Ka qenë dëshmia e Pines ajo që zbuloi grupin në fjalë dhe kokën e këtij grupi, Admir Tafilaj, i cili edhe pse qëndron prej vitesh i burgosur me dënim të përjetshëm, fakt ky që nuk e ka penguar që të urdhërojë dhe të koordinojë nga qelia vrasje me pagesë.
Të pandehurit e kryesorë të këtij procesi, Admir Tafilaj, Kristi Pine, Elson Merdani dhe Dritan Peksani, akuzohen për vrasjen e Ibrahim Manit në qershor të vitit 2014 në Shkodër, vrasjen e mbetur në tentativë të Edmond Çakmashit, sigurimin e kushteve dhe mjeteve për vrasjen e Leonard Muratit, i cili u vra nga të tjerë persona, që ende nuk janë identifikuar, si dhe për armëmbajtje pa leje, vetëgjyqësi dhe moskallëzim krimi. Të gjitha këto veprime, sipas prokurorisë, janë kryer në kuadër të grupit të strukturuar kriminal.
