Policia e Shtetit ka arrestuar pas disa vitesh në kërkim shtetasin nga Vlora Genis Mëhillaj, njëri prej pjesëtarëve të “grupit të tritolit” me killer Julian Sinanajn.
Mëhillaj ishte një prej personave kyç të grupit, pasi ai kryente rolin e porositësit, apo ndërmjetësit për kryerjen e vrasjeve që realizoheshin nga Julian Sinanaj, i cili kryesisht organizonte sulme me tritol.
Ky grupim akuzohet edhe për vendosjen e tritolit pranë banesës së ish-deputetit të PD Ardian Kollozi dhe në mjetin e ish-prefektit të Vlorës Besnik Dervishi.
NJoftimi i policisë:
Më datë 06.03.2017, Specialistët e Seksionit të Kërkimit të Sektorit të Forcës së Posaçme të Operacioneve Speciale dhe Kërkimit, kanë bërë të mundur arrestimin e shtetasit të shpallur në kërkim:
– Genis Mehillaj, 46 vjeç, banues në Vlorë.
Arrestimi i këtij shtetasi u bë pasi Prokuroria e Krimeve të Rënda Tiranë, ka dërguar urdhërin për ekzekutimin e vendimit penal, të Gjykatës së Rrethi Gjyqësor Tiranë, e cila e ka caktuar masën e sigurisë “Arrest me Burg”, për veprat penale “Qëllime terroriste”, “Vrasje në rrethana cilësuese ndaj një punonjësi që kryen funksione publike”, “Mbajtje pa leje të armëve e municioneve luftarake” dhe “Mbajtje pa leje të lëndëve plasëse”, parashikuar nga nenet 230/1 C, 79/c, 278/2 dhe 278/4 të Kodit Penal.
Ky shtetas ndodhet në ambientet e Drejtorisë Vendore të Policisë Tiranë, e pritet ti kalojë për veprime të mëtejshme Drejtorisë Vendore të Policisë Vlorë./a.m.
