Një grup i djathtë izraelit ka organizuar fluturime të fshehta për të transferuar palestinezë nga Gaza drejt vendeve të ndryshme në botë, përfshirë Afrikën e Jugut dhe Indonezi, sipas një investigimi të agjencisë Associated Press (AP).
Fluturimet, të cilat kanë nisur që nga maji i vitit 2025, kanë transportuar qindra palestinezë që dëshironin të largoheshin nga enklava e shkatërruar nga lufta. Një nga fluturimet e fundit, me rreth 150 pasagjerë, ka ardhur si surprizë për banorët në Afrikën e Jugut në nëntor.
Pas fluturimeve qëndron organizata Al-Majd, e prezantuar si humanitare dhe e përkushtuar për të ndihmuar komunitetet myslimane në zona konflikti. Megjithatë, pas investigimeve, u zbulua se pas saj qëndron Tomer Janar Lind, themelues dhe pjesëtar i grupit të djathtë izraelit Ad Kan, i cili ka për qëllim të avancojë ide të caktuara politike, përfshirë mbështetjen e propozimeve të presidentit Donald Trump për zhvendosjen e palestinezëve nga Gaza.
Fluturimet u organizuan përmes kontratash dhe marrëveshjesh me kompani të tjera, për të shmangur lidhjen direkte me Izraelin. Sipas dokumenteve të siguruara nga AP, një kompani e paguar për shërbimin e “evakuimit me avion” ka marrë të paktën 750,000 dollarë. Pasagjerët paguan deri në 2,000 dollarë për person, duke përdorur transferta bankare dhe kriptomonedha.
Shumë nga palestinezët e intervistuar nga AP thanë se nuk dinin se kush qëndronte pas fluturimeve, por kjo nuk ishte problem për ta, për sa kohë mund të largoheshin nga Gaza e shkatërruar.
“Ishte uria dhe nuk kishim zgjedhje. Fëmijët e mi pothuajse u vranë”, tha një 37-vjeçar që arriti në Afrikën e Jugut në nëntor.
Grupi Ad Kan dhe themeluesi i tij, Gilad Ach, janë aktivistë të djathtë dhe mbështesin zhvendosjen e palestinezëve nga Gaza si një fitore territoriale. Ach mohon pretendimet se fluturimet kishin për qëllim pastrimin etnik të Gazës dhe Bregut Perëndimor, duke i cilësuar ato si fluturime humanitare, ndërsa disa nga pasagjerët paguan pjesërisht shpenzimet.
Fluturimet u kryen nga aeroporti Ramon në jug të Izraelit dhe drejt destinacioneve si Afrika e Jugut, Indonezia dhe Malajzia, pa mundësi zgjedhjeje nga pasagjerët për destinacionin. Familjet që fluturuan thanë se qëllimi i tyre i vetëm ishte të shpëtonin familjet e tyre dhe nuk i interesonte kush ishte pas organizimit.
Situata ngre shqetësime ndërkombëtare për të ardhmen e palestinezëve të larguar dhe për natyrën e vërtetë të këtyre fluturimeve, të cilat disa kritikues i shohin si një formë të presionit politik dhe zhvendosjeje të popullsisë palestineze.
