Kryeministri i Maqedonisë Nikolla Gruevski ka adresuar kritika të ashpra ndaj liderit të LSDM-së Zoran Zaev, duke e akuzuar se ai dëshiron ta përgjak popullin në Maqedoni. Gruevski këtë akuzë e bëri në fjalimin e mbrëmshëm të organizuar në Shkup nga partia e tij VMRO-DPMNE, informon Zhurnal.
“Kjo është një lojë e pistë ndaj Maqedonisë. Për atë edhe do ta fitojmë dhe nuk do të lejojmë që populli ynë të përgjaket dhe të përleshet mes vete. Eksponenti dhe instrumenti i tij nuk do të mund të arrijë qëllimin. Ky njeri jo vetëm që nuk do të bëhet kryeministër, ai asnjëherë nuk do të fiton besimin e qytetarëve të Strumicës që të bëhet përsëri kryetar komune”, tha Gruevski duke folur për liderin e opozitës Zoran Zaev.
Gruevski siç duket është i bindur se Zaev nuk do të bëhet asnjëherë kryeministër i Maqedonisë, ai madje shkon aq larg sa që deklaron se Zaev do ta humb postin e kryetarit të komunës.
Këto parashikime të Gruevskit sipas analistëve duhet të vlerësohen si kërcënime ndaj opozitës dhe ai më këto kërcënime dëshmon se përmes kontrollit të institucioneve shtetërore do të jetë kryeministër i përjetshëm.
