Opozita maqedonase sot ka nxjerrë në publik dëshmi të reja për keqpërdorime nga ana e ish-kryeministrit Nikolla Gruevski, duke publikuar dokumente sipas të cilave ai brenda vetëm një viti ka “kursyer” 118.629 euro, apo mesatarisht nga rreth 10 mijë euro në muaj, edhe pse rroga e tij mujore është 88.139 denarë, apo 1.430 euro.
Zëdhënësi i Lidhjes Socialdemokrate të Maqedonisë Petre Shilegov, duke paraqitur dokumente që provojnë pohimet e mësipërme, sot para gazetarëve i bëri edhe disa pyetje:
“Çfarë është ajo që, mes tjerash, dëshiron ta fshehë Nikolla Gruevski?, Pse aktivistë partiakë dhe donatorë të VMRO-DPMNE-së janë anëtarë të Komisionit Kundër Korrupsionit?, Cilat janë arsyet për fshehjen e fletëve anketuese të Nikolla Gruevskit të viteve 2014 dhe 2015?”, pyeti Shilegov.
Ai para gazetarëve shpalosi dokumentet që provojnë se Gruevski brenda vitit 2015 është pasuruar për 118.629 euro.
“Ja Fletët e fshehura të Nikolla Gruevskit për vitin 2014 dhe 2015. Gruevski i falur ka kursyer nga 10.000 euro për çdo muaj! Ose, për një vit Nikolla Gruevski zyrtarisht është bërë më i pasuruar për 118.629 euro. Gruevski i ka rritur edhe kursimet në dollarë amerikanë, franga zvicerane dhe sterlina britanik në llogaritë e tij devizore, por më së shumti i ka rritur shumat në denarë dhe euro. Ka paraqitur të hyra në bankë në vlerë prej 300.000 por edhe nga 3.000.000 denarë. Është interesante që për këto të hyra të mëdha nga 2.000.000 – 3.000.000 denarë në vitin 2015, Gruevski në fletën anketuese arsyetohet se i ka në periudhën 2005-2012. Por, nëse është kështu, përse nuk i ka paraqitur në fletën anketuese të vitit 2014? Neto rroga e Gruevskit është 88.139 denarë. Që Gruevski nuk është mbështetur në rrogën e tij, tregon edhe kolona për bazën e posedimit. Këtu, siç është theksuar, Nikola Gruevski ose nuk ka paraqitur të dhëna, ose ka thënë se i ka përfituar paratë në ndonjë mënyrë tjetër. Nikola Gruevski nuk i është përgjigjur Komisionit për parandalimin e korrupsionit, por patjetër do t’u japë përgjigje qytetarëve”, tha Shilegov.
Cila është ajo mënyrë në të cilën Gruevski bën profit prej 118.629 euro për vetëm një vit, ndërkohë që 500.000 njerëz në Maqedoni po gufaten në varfëri?, pyet opozita maqedonase.
“Qytetarët e dëgjuan Të Vërtetën për Maqedoninë dhe për of-shor relacionet e Gruevskit me vendet parajsore, për tenderët dhe provizionet milionëshe, për parcelat në Vodno. Kjo është edhe një arsye shtesë pse Gruevskit i nevojiten abolicionet e Gjorge Ivanovit. Atij dhe bashkëpunëtorëve të tij. Abolicioni duhet tërësisht të shfuqizohet dhe të gjithë që kanë bërë keqpërdorime në dëm të qytetarëve do të përgjigjen. Nuk ka shpëtim për Gruevskiin e falur dhe shoqërinë e tij”, porositi zëdhënësi i LSDM-së. Express/ a.k
Ja dokumentet që shpalosi sot opozita maqedonase:
