Akoma nuk ka një përgjigje konkrete për hapat e mëtejshëm të BDI-së në Maqedoni. Të paktën kështu konfirmuan sot nga kjo parti. Por ish-kryeministri dhe kryetari i VMRO-DMNE-së, Nikolla Gruevski ka shuar kureshtjen e opinionit, duke qartësuar se BDI nuk ka dalë nga qeveria.
Ai e konsideron krejtësisht normale opsionin e BDI-së për të bërë zëvendësim të ministrave të vjetër me ministra të rinj.
“Nuk është e saktë se kemi mbetur vetëm ne dhe LSDM-ja në qeveri. Nga ajo që shoh unë, BDI nuk e ka lëshuar qeverinë por se do të bëjë zëvendësimin e kuadrove të saj. Çdo parti politike ka të drejtë të realizojë zëvendësime të kuadrove të saja në qeveri, të ofrojë kuadro të reja, kuptohet ato duhet të përmbushin disa parakushte të caktuara për kualitetin por kanë të drejtë për ndërrime të kuadrove të tyre”, deklaroi Nikolla Gruevski, Kryetar i VMRO-DPMNE.
Nga ana tjetër ekspertët vlerësojnë se ky vendim ka ardhur si pasojë e flijimit kolektiv të kësaj partie, apo thënë ndryshe “Të gjithë për një, një për të gjithë”.
“Konsideroj se ky vendim vjen si pasojë e kësaj situate pra që të mos sakrifikohet vetëm njëri nga anëtarët e qeverisë por të sakrifikohen të gjithë pjesëmarrësit apo përfaqësuesit shqiptarë në ekzekutiv. Vlerësoj se pas kësaj situate, pas vendimit për tërheqjen e ministreve BDI-së i mbetet rrugë e vetme që të zgjedhë anëtarë apo emra të rinj në qeverinë e re sepse nuk ka mënyrë tjetër se si të procesohet kjo çështje në mënyrë institucionale në Parlamentin e Maqedonisë meqë e dimë se VMRO-DPMNE ka vetëm 60 deputetë ndërsa në anën tjetër LSDM-ja BDI-ja dhe PDSH-ja pa tre deputetet e pavarura që ishin pjesëtare të LSDM-së nuk mund të formojnë shumicën e re parlamentare dhe vendi do të mbetet në krizë institucionale”, tha Sefer Tahiri, ekspert politik.
Për Xhelal Nezirin përgjimet që shënjestruan funksionarët e BDI-së nënkuptojnë një goditje të fuqishme për këtë parti.
“Dhe çfarë ndodhi me këto përgjime, pra këto ishin goditja vdekjeprurëse për BDI-në është pak e çuditshme që gjithë ato afera korruptive që i dëgjuam nuk patën asnjë efekt, mirëpo kjo aferë pra e par që doli në opinion, edhe pse nuk jam i sigurt nëse është e vërtetë apo rast i montuar, BDI-ja u ballafaqua me reagime tepër negative dhe tepër të ashpra Brenda saj”, tha Xhelal Neziri, Gazetar.
Arsyeja kryesore e marrjes së këtij vendimi nga ana e BDI-së ka ardhur si pasojë e përgjimeve të paligjshme nga siç i kanë quajtur, autorë të nëntokës që nuk ia duan të mirën BDI-së, ku targeti kryesor i këtyre bisedave kanë qenë zëvendës-kryeministri Musa Xhaferri dhe deputetja Ermira Mehmeti.