Detaje të tjera të reja mësohen nga vrasja që gruaja i bëri burrit në fshatin Barbullush të Bashkisë së Vaut të Dejës. Mirela Buzalli, 35 vjeçe goditi me sëpatë mëngjesin e së hënës bashkëshortin e saj, 45-vjeçarin Shkëlzen Buzalli teksa ky i fundit po flinte. Pas ngjarjes së rëndë, autorja e krimit ka shkuar në Polici dhe ka rrëfyer gjithçka çfarë ka ndodhur.
Fillimisht, gruaja nuk ka dashur që të flasë shumë për oficerët e policisë dhe është mjaftuar duke thënë se ka pasur xhelozi mes tyre dhe se bashkëshorti i saj e ka goditur disa herë kohët e fundit duke e kapur nga flokët e madje e ka fyer edhe nga ana fetare. Por, oficerët kanë vijuar që ta pyesin disa herë në momente të ndryshme 35-vjeçaren, Mirela Buzalli, e cila mbyti bashkëshortin e saj me sëpatë teksa ai po flinte.
Gradualisht gruaja ka nisur që të tregojë më shumë për rrethanat në familjen e tyre dhe shkaqet që e kanë çuar në krimin e rëndë. Ajo që ka lënë të kuptohet 35-vjeçarja është se brenda në dhomë kur ka ndodhur ngjarja ka qenë djali 12-vjeçar. I mituri, sipas nënës së tij, po flinte me babanë në shtrat veçmas.
Kohët e fundit, çifti flinte në një dhomë, por në shtretër të ndarë për shkak të konflikteve që kishin nisur kohët e fundit. 35 vjeçarja ka rrëfyer se është siguruar që përpara se ta godiste bashkëshortin e saj të mos i ndodhte asgjë djalit të saj 12-vjeçar.
Të gjithë ngjarjen e ka menduar dhe përgatitur vetëm natën e fundit pasi debatet mes çiftit kanë qenë të ashpra ka treguar Mirela në Polici.
KONFLIKTI ME VJEHRRËN Më tej teksa ka vijuar që të merret në pyetje, 35-vjeçarja ka bërë të ditur për Policinë se një prej shkaqeve kryesore që ka acaruar marrëdhëniet në çift ka qenë vjehrra e saj duke qenë se sipas autores së krimit, vjehrra nuk e donte atë sepse ishte e një besimi tjetër.
“Që në fillim vjehrra ime nuk më ka dashur. Ajo është shkaku kryesor i çdo gjëje për konfliktet që kemi pasur me bashkëshortin tim. Nuk më ka dashur sepse jam e krishterë dhe jo myslimane. Vjehrra asnjëherë nuk na linte rehat në punët tona dhe ndërhynte për çdo gjë dhe donte vetëm të prishte punë. Për këtë, dëshmitarë janë vetëm fëmijët dhe askush tjetër, sepse në sytë e të tjerëve nuk e shfaqte këtë gjë dhe ruhej. Edhe ne ruheshim në mënyrë që të mos e merrnin vesh të gjithë për problemet që kishim”.
Sipas 35-vjeçares, vjehrra kishte nxitur të birin kundër nuses.
“Shkëlzeni nisi që t’i besonte. Bashkëshorti im nisi që të mbajë anën e nënës së tij dhe kjo gjë solli edhe debate e konflikte mes nesh. Pas debateve, bashkëshorti nisi që të më godasë dhe të më thoshte të mos flisja. Më rrihte dhe më kapte nga flokët duke më shtrirë në tokë. Një herë më leu me benzinë në gjithë trupin dhe më tha mirë thotë nëna, t’i duhet të digjesh me benzinë. Kur më leu me benzinë u tremba se mos do të më digjte të gjallë. Në këtë moment fëmijët nuk kanë qenë në shtëpi”, ka deklaruar Mirela.
E pyetur se si e ka kryer krimin, 35- vjeçarja është përgjigjur duke thënë se atë natë nuk e ka zënë gjumi dhe se sëpata ishte brenda në dhomë sepse aty e mbante bashkëshorti i saj. Në një moment e ka marrë dhe e ka goditur disa herë direkt e në kokë derisa është siguruar se e ka mbytur.
Më pas ka shkuar në Polici bashkë me djalin e saj që ishte në dhomë në momentin e krimit, ndërsa dy fëmijët e tjerë kanë dalë nga dera e shtëpisë dhe kanë shkuar te shtëpia e gjyshërve, që është aty afër në fshatin Barbullush./Panorama/a.m.
