Gruaja e cila takoi vrasësin e dy turistëve çekë Sokol Mjacaj pak para dorëzimit të tij në polici ka treguar momentet e fundit të tij dhe negociatat me uniformat e rendit.
Age Koçeku, gruaja që banon në ndërtesën ku mendohej se u fsheh 20 vjeçari Mjacaj, ka treguar për News24 se ai shkoi në banesën ku ajo jeton dhe i kërkoi asaj telefonin celular që të komunikonte me policinë për kushtet e dorëzimit.
Age Koçeku tregon se Mjacaj ishte mjaft i qetë dhe i paarmatosur. Madje ai ndërsa nuk i tregoi asaj asgjë lidhur me krimin që kishte bërë.
“Ka ardhur ka folur me nënën time. E shikova. Kur doli atje në rrugë krejt, i them unë ça deshe ti djalë. “Jo, asgjë”, tha edhe iku për tek apartamenti që është përballë. Hyri atje brenda, hoqi çorape, mori një palë pantofla. Edhe unë hyra brenda, veç kur fap erdhi. “Unë dua ujë”, tha. Po mo sa të duash ujë. I thashë mos je ai djali që janë duke e kërkuar? “Po tha unë jam ai djali”. Duke ndenjur i thashë Pashë Zotin dorëzohu, se i mbante duart në xhepa. Unë kisha frikën time. Më shumë frikë kisha unë, ai nuk shqetësohej hiç. Edhe i them Pashë Zotin dorëzohu se po më bën sherr mua dhe vetes. “Jo tha – s’kam kurrgjë”. Se kisha frikë mos kishte ndonjë armë, që i mbante duart në xhepa dhe po më vriste. Nxori një brisk nga xhepi dhe e futi prapë. Më tha “a ke telefon”. Po i thashë kam. Mori policinë. Foli veças, i fola dhe unë dhe erdhi fill policia. S’ka vonu as 2-3 minuta se ishin të gjithë këtu. Më tha “A ka mundësi të dalim të dy bashkë”, ky djali se më duket kishte frikë. Po mor i them edhe dolëm të dy bashkë. Unë përpara, ai mbrapa. Kur kam dalë jashtë u kam thënë Pashë Zotin mos e përkitni se më vinte gjynah. Thosha po e kapin, Zoti e di ça po i bëjnë. Jo, jo thanë mos ke merak. E morën edhe ikën, kaq ishte. As biseduam gjë, as në lidhje me vrasjen, se unë isha tu maru për vete. Më e shqetësuar isha unë, se ai. Ai ishte krejt normal, thua se s;ka ndodhur asgjë. Bile po shikonte televizor, duke parë veten, duke dëgjuar lajmet. E dëgjonte edhe policinë që i bënte thirrje”, tregon ajo.
