Partia Demokratike ka protestuar sot përpara bashkisë së Tiranës në mbrojtje të një punonjëseje të pushuar nga puna e cila pretendon se është dhunuar nga kryebashkiaku Erion Veliaj.
Ka qenë Lidhja Demokrate e Gruas e cila ka protestuar pas largimit nga puna të specialistes së financës, Violeta Gecaj e cila ka deklaruar se është dhunuar nga kryebashkiaku Erion Veliaj.
Përpara kamerave gruaja deklaroi se ka shkuar në zyrën e Veliajt për t’i kërkuar ndihmë por ai e ka dhunuar duke i thënë t’i drejtohet SHQUP-it.
“Më kanë dhunuar. Të shkosh në shtëpi e dhunuar nga eprori yt që i ke dhënë votën dhe e ke besuar. Shkova për t’i kërkuar ndihmë por u përballa me dhunë fizike. Më shtyu dhe më përzuri. Kërkova të drejtën time, pse më ke larguar padrejtësisht nga puna. Më tha drejtoju SHQUPit, drejtoju Lulit, shporru nga Bashkia. Unë isha specialiste e mesme në Drejtorinë e financës si magaziniere, paguhesha 267 mijë lekë të vjetra, jemi 7 anëtarë në familje. S’kam bërë ende padi do e marr një vendim nesër sapo të marr arsyen e largimit, pastaj do veproj”, u shpreh Violeta Gecaj.
Sakaq deputetja e PD Albana Vokshi tha se ky është një rast tronditës duke i kërkuar kryeprokurorit Adriatik Llalla të nisë hetimet. Vokshi i ka bërë apel edhe Avokatit të Popullit të trajtojë këtë çështje.
“Rasti i zonjës Violeta Gecaj është rast rrëqethës, tronditës ndaj dhe ne i kërkojmë Prokurorit të Përgjithshëm të nisë hetimin penal ndaj kreut të bashkisë, Erion Veliaj, bazuar në kodin penal për të gjithë dhunuesit e grave. Është një dhunë verbale, fizike e vazhdueshme. Avokati i Popullit të trajtojë këtë çështje dhe të gjitha grave dhe vajzave që po pushohen me anë të një zarfi nga Veliaj”, deklaroi Vokshi.
