Përplasja mes Shteteve të Bashkuara dhe vendeve europiane mbi Groenlandën ka tërhequr vëmendjen e Moskës, e cila po i shikon zhvillimet me interes.
Ndërsa tensionet mes Donald Trump dhe liderëve europianë po rriten, Rusia po e përdor këtë mundësi për të shfaqur pikëpamjet e saj.
Ministri i Jashtëm rus, Sergey Lavrov, ka komentuar se Groenlanda nuk është një pjesë natyrale e Danimarkës dhe ka sugjeruar se çështja e ish-territoreve koloniale është bërë gjithnjë e më problematike.
“Groenlanda, në thelb, nuk është pjesë natyrale e Danimarkës, apo jo? As ka qenë pjesë e Norvegjisë apo e Danimarkës. Ka qenë një pushtim kolonial. Fakti që tani banorët janë mësuar me këtë dhe ndihen rehat është një çështje tjetër,” tha Lavrov.
Megjithatë, ndërsa përçarjet mes aleatëve transatlantikë ngrohin Moskën, Rusia ka hedhur poshtë çdo sugjerim për dëshirën e saj për të kontrolluar ishullin. Lavrov theksoi se Rusia nuk ka asnjë interes për të ndërhyrë në çështjen e Groenlandës.
Në një tjetër deklaratë, Lavrov ka kritikuar ashpër Britaninë e Madhe për rolin e saj të fortë në mbështetje të Ukrainës dhe ka theksuar se ky shtet nuk ka arsye të quhet “i madh”. “Pa ofendim, por mendoj se duhet ta quajnë thjesht ‘Britani’. Ky është rasti i vetëm në histori kur një vend e quan veten ‘të madh’,” tha ai.
Rusia ka akuzuar Londrën se po punon në prapaskenë për të minuar interesat e Moskës globalisht, duke vendosur gjithashtu kufizime për diplomatët britanikë.
Ndërsa përjashtoi mundësinë e arritjes së ndonjë marrëveshjeje me udhëheqësit europianë, Lavrov ka shprehur gatishmërinë për të bashkëpunuar me Shtetet e Bashkuara, sidomos në lidhje me situatën në Ballkan, përfshirë Bosnjën dhe vendet e tjera të rajonit.
