Gripi stinor A i ka marrë jetën një tjetër shtetasi shqiptar. Rasti konfirmohet nga Ministria e Shëndetësisë sipas së cilës pacienti B. Z., 3 vjec, lindur në Shënkoll, i vaksinuar rregullisht, ka patur prej një jave klinikë me temperaturë dhe ethe.
MSH thotë se shtetasi në fjalë pasi është paraqitur disa herë në urgjencën e spitalit Lezhë, më datë 14 Janar shtrohet në spitalin e Lezhës me diagnozën “Infeksion viral me insufiçiencë respiratore”, ku edhe pas trajtimit spitalor gjendja mbetet e njëjtë.
“Më datë 15/01/2017 transferohet në Tiranë dhe shtrohet në Reanimacionin e Shërbimit të Pediatrisë në QSUT, ku ka patur edhe shenja të tjera klinike si, mosreagim ndaj dhimbjes, hipotoni muskulare, gjendje prekome, vështirësi në frymëmarrje dhe frymëmarrje të zhurmshme. Pacienti është konfirmuar me diagnozën: “Encephalomielit”” – informon ministria e Shëndetësisë.
Gjatë të njëjtës javë, familjarët me të cilët jeton, katër pjesëtarë (nëna, babai, gjyshja, gjyshi) kanë kaluar sëmundje respiratore të ngjashme me gripin. Mostrat e marra për ekzaminim nga ISHP-ja konfirmojnë që pacienti ishte i prekur nga virusi i gripit stinor A.
Edhe pas trajtimit në Reanimacionin e Shërbimit të Pediatrisë në QSUT, pacienti ndërron jetë në orët e para të mëngjesit të datës 17/01/2017.
Ky është rasti i pestë i konfirmuar nga Ministria Shëndetësisë për persona që kanë ndërruar jetë, të cilët, përveç sëmundjeve të tjera, kanë rezultuar të prekur edhe nga virusi i gripit të stinës A. /b.d
