Gripi sezonal është në kulmin e qarkullimit në të gjithë vendin. Infektimet nga AH1N1 dhe AH3N2 vijojnë të rriten veçanërisht tek të miturit dhe fëmijët e moshave shkollore. Referuar buletinit të Institutit të Shëndetit Publik, java e fundit e janarit shënoi intensitet shumë të lartë të qarkullimit të gripit dhe infeksioneve të tjera respiratore.
Mbi 23300 pacientë kërkuan ndihmën e mjekut vetëm javën e fundit të janarit, ndonëse shifrat e sëmundshmërisë janë më të larta pasi jo të gjithë i drejtohen qendrave shëndetësore. Kulmi i epidemisë së gripit ndihet edhe në urgjencën kombëtare, ku janë rritur thirrjet për ndihmë, kryesisht nga të moshuarit.
Ndryshe nga një vit më parë kur fillimi i shkurtit shënoi ulje të intensitetit të gripit, këtë sezon kurba e infektimeve po njeh vetëm rritje. Referuar edhe situatës epidemiologjike në vendet e Europës, ekspertët e shëndetit publik thonë se deri në mes të shkurtit do të jemi në nivele shumë të larta të qarkullimit të infeksioneve respiratore.
Dominon gripi në bashkë qarkullim me RSV, ndërsa COVID ka raste shumë më të ulëta. Sipas të dhënave të ISHP, fëmijët deri 14 vjeç janë grupmosha më e prekur nga infeksionet respiratore. Ndërsa komplikacionet më të mëdha raportohen tek moshuarit.
Për shkak të formave të rënda të gripit apo mbivendosje me sëmundje të tjera janë rritur urgjencat dhe shtrimet në spitale. Durrësi, Tirana dhe Mati janë qytete që kanë nivelet më të larta të qarkullimit dhe sëmundshmërisë nga gripi.
