Tre raste vdekjesh janë regjistruar pranë Sanatoriumit të Tiranës, të prekur nga gripi. Sipas Silva Bino, nga Instituti i Shëndetit Publik deri tani dy të sëmurët që vinin nga Elbasani kanë ndërruar jetë si pasojë e virusit AH1N1.
Sipas zonjës Bino personi i tretë që ka humbur jetë është nga Tirana, por ende nuk është konfirmuar nëse vdekja është shkaktuar nga gripi.
Autoritetet thonë se jemi në sezon gripi por nuk ka nevojë për panik, sidomos për lajmet për gripin e derrit. Edhe në qytete të tjera ka patur rritje të fluksit të pacientëve, të prekur nga gripi. Sipas mjekëve gripi këtë vit prek mushkëritë dhe sjell vështirësi në frymëmarrje.
Personat që kanë sëmundje kronike, si diabet, probleme pulmonare, apo janë obezë, janë të prirur të shfaqin komplikacione nëse preken nga virusi i gripit. Ndaj, sipas ekspertëve, ata duhet të rendin të bëjnë vaksinën e gripit.
Ndërkohë Ministria e Shëndetësisë dhe Mbrojtjes Sociale apelon për vaksinimin, ndërsa thotë se viruset e gripit janë të paparashikueshëm.
“Viruset e gripit janë në ndryshim të vazhdueshëm dhe imuniteti i përftuar nga vaksina e kryer më parë, bie me kalimin e kohës. Vaksina ndaj gripit mund të kryhet nga çdo individ mbi 6 muaj”, njofton Ministria e Shëndetësisë dhe Mbrojtjes Sociale ndërsa ka publikuar dhe disa këshilla si të sillemi kur jemi më grip.
