Influenca aviare, H5N1 po ndikon negativisht në tregun e vezëve, tashmë ky produkt tek fermerët kushton prej ditës së sotme kushton 5 lekë më tepër.
Tek stabilimentet e pularive gripi i shpendëve ka qenë më agresiv se sa tek fermat e fshatarëve.
Gripi i shpendëve në Shqipëri ka sjellë dhe rritje të çmimit të vezëve Asgjësimi i 430 mijë pulave ka bërë që një kokërr vezë për konsumatorin të kushtojë 66.6% më tepër, e përkthyer në para do të thotë 10 lekë më shumë.
Po për ekspertët e bujqësisë ky ndryshim çmimi është abuziv nga tregtarët.
“Është një rritje e pajustifikuar sepse ne kemi 7 mln krerë dhe 5 mln prej tyre janë për prodhim vezësh, mendoj se kjo ka të bëjë më vendosjen e monopoleve në këtë treg në Shqipëri. Ka shumë pak kompani që merren me importin dhe eksportin e tyre, dhe kjo e bën të lehtë vendosjen e çmimit nga këto kompani”, tha Ndoc Fasllia, ekspert bujqësie.
Asgjësimi i 430 mijë pulave, deri më tani nuk ka sjellë mungesë të këtij produkti në markete.
“Nëse situata përkeqësohet atëherë ka vend për ndërhyjnë nga Ministria e Bujqësisë për të zbutur koston e prodhimi apo për të marrë masa për zëvendësimin e këtyre shpendëve, por sot nuk jemi në këtë fazë pasi dëmi është shumë i vogël”, shton më tej eksperti i bujqësisë.
Kjo nuk është një situatë e re as për biznesin e pularive dhe as për konsumatorin, pasi në vitin 2022 si pasojë e gripit të shpendëve u asgjësuan gjysmë milioni pula, në atë kohë një kokërr vezë në market kapi vlerën e 30 lekëve, ndërsa veza e fshatit 50 lekë.
