Një nga lojtarët më të mirë të botërorit të shkuar, një prej futbollistëve për të cilët “Barcelona” do bënte çmenduri, por francezi ka vendosur të qëndrojë te “Atletiko Madrid” edhe këtë sezon. Shkaku, sipas asaj, që ka deklaruar vetë lojtari është Lionel Messi.
“Ishte vërtet shumë e vështirë t’i thoja jo ‘Barcelonës’. Është një nga skuadrat që çdo futbollist do donte të luante. Një kontratë që të jep mundësi të fitosh gjithçka. Të jep mundësinë të jesh pranë Lionel Messit, një prej futbollistëve më të mirë të historisë së futbollit botëror. Por pikërisht prej faktit se do isha një zëvendësues i tij, ose do shërbeja si ushtar i Messit në fushë unë refuzova këtë mundësi dhe zgjodha të qëndroja te “Atletiko Madrid”, tha francezi.
“Ishin ditë të vështira për mua, nga njëri krah tifozët kishin nisur të më vërshëllenin dhe nga krahu tjetër kisha kontratën e “Barcelonës” gati. Zgjoja gruan në tre të mëngjesit për të diskutuar me të lidhur me të ardhmen tonë. Por, një ditë, pasi përfunduam ndeshjen, skuadra erdhi dhe më motivoi, m’u afruan lojtarët dhe më kërkuan të qëndroja. Po ashtu trajneri Simeone erdhi për darkë nga ne dhe me tha se kishte nevojë për mua në skuadër. Vetë drejtuesit e bardhekuqve më ofruan një kontratë të re me rrogë më të rritur dhe pas kësaj vendosa me qetësi të qëndroja”, tha Griezman për “Canal Plus”.
A.Fortuzi / ATA
