Deputetja demokrate Grida Duma konfirmoi në studion e Debatit në A2 CNN se ka shkëputur çdo komunikim me Lulzim Bashën, me arsyetimin se ishte ndër zërat kryesorë që kërkoi prej tij marrjen e përgjegjësisë për humbjen në zgjedhjet e pjesshme lokale të 6 marsit.
“E natyrshme se kam qenë ndër personat që kam qenë më e zëshme në marrjen e përgjegjësisë së tij (Bashës). Është e natyrshme. Nga pikëpamja njerëzore nuk doja të vendoseshim në asnjë pozitë me njerëzit që kemi bashkëpunuar. Nga pikëpamja politike jemi të detyruar të kuptojmë të vërtetat”.
E pyetur nëse Berisha dhe Basha mund të jenë bashkë në terren në fushatë, Duma u përgjigj se: “Nuk shoh asnjë problem këtu për të kërkuar vota për demokratët. Basha i detyrohet demokratëve”.
Por ndryshe e sheh analisti Lutfi Dervishi sipas të cilit, as vetë Basha nuk e dëshiron rikthimin në politikë në këto kushte, kur kanë dalë në skenë edhe financimet ruse.
“Në politikë mund të vritesh e ringjallesh disa herë por duhet të dish të lexosh kohën tënde. Asgjë nuk mund të përjashtohet, por nuk më duket se po përgatitet për t’u rikthyer në politikë, sidomos pas daljes në skenë të financimeve ruse. Dy foto FB nuk janë lëvizje politike. Lëvizjet politike janë ide. Nuk e shoh që edhe vetë e dëshiron një gjë të tillë më shumë e shoh si kuriozitet mediatik”.
E pyetur për ambicien e saj politike në prag të zgjedhjeve lokale, Duma u përgjigj se për momentin nuk ka ambicie në PD.
“Rrugën ta mëson përpjekja, nuk ka rrugëtim politik me hartë të përcaktuar. Nuk është ky momenti për të bërë diskutime për ambicien time. Unë jam në disa detyra në PD dhe përfaqësoj opozitën sa mundem dhe besoj që e bëj mirë këtë”.
