Greta Koçit i vënë “vizën” në selinë qëndrore të PD-së si kandidate në garën për kryetar të FRPD-së. Në letrën publike që shefja e sekretariatit për shoqërinë civile në PD, Nevila Xhindi, u ka dërguar kandidatëve në garë, rezulton se nuk figuron emri i Greta Koçit, e cila është ende nënkryetare e FRPD-së.
Siç është bërë e ditur zyrtarisht, në garë janë pesë kandidatë: Belind Këlliçi, Oriela Nebijaj, Greta Koçi, Lisandër Hoxha dhe Ervin Salianji. Por duket se sekretariati për shoqërinë civile në PD, si për ironi, ende nuk e ka informacionin se cilët janë kandidatët në këtë garë.
Problematika në fjalë bëhet pak serioze po të kihet parasysh se shefja e departamentit u ka dërguar një letër publike të katër kandidatëve me titull: “Letër e hapur për miqtë e mi garues në Forumin Rinor: Orin, Belindin, Ervinin, Lisandrin..”, duke lënë “prapa liste” Greta Koçin. “Mes shumë takimeve dhe angazhimeve në këto ditë, kam prioritet edhe takimin me secilin prej jush”, nis letrën e saj shefja e sekretariatit për shoqërinë civile.
Por kjo ka shkaktuar reagime mjaft të ashpra brenda FRPD. Sipas disa anëtarëve të këtij Forumi, anashkalimi i Koçit bëhet me qëllim për të favorizuar persona të tjerë në garë, duke zhvlerësuar në këtë mënyrë edhe parimin “një anëtar, një votë”, nëpërmjet të cilit po synohet të zgjidhet kreu i ri i FRPD-së. Në disa prej këtyre reagimeve nënvizohet se shefes së sekretariatit në PD për shoqërinë civile nuk i falet për pozicionin që ka ky diferencim, pasi haptazi duket se mban krahë.
Por në vend të tërheqjes zyrtarja e lartë në PD ka vijuar më tej duke replikuar ndaj këtyre kritikave në Facebook duke u shprehur se “Letra vlen për këdo në garë, na vlen ne. Sigurisht edhe për Gretën nëse eshte në gare”. Për hir të së vërtetës Greta është në garë dhe kjo është tani zyrtare. Por mesa duket vetëm zyrtarja e lartë e PD-së nuk është ende në dijeni të këtij fakti. Përpara se të bënte publike letrën e saj publike, mjafton të pyeste dy dyer më tej në selinë qëndrore të PD-së ku ndodhen personat përgjegjës që po regjistrojnë kandidatët për kryetar të FRPD.
