Këtë të enjte Greqia është zgjuar në një grevë të përgjithshme, e para e tillë kundër qeverisë së majtë të Kryeministrit Cipras, që nga marrja e pushtetit në janar. Për të gjithë ditën të gjitha shërbimet shtetërore, duke nisur nga ministritë, zyrat e tatim taksave, bashkitë e prefekturat e deri tek shkollat, bankat dhe farmacitë, do të jenë të mbyllura.
Konfederata e sektorit publik ADEDY dhe e atij privat GSEE, janë duke protestuar kundër politikave shtrënguese dhe rritjes së taksave, që qeveria Cipras, është etyruar të zbatojë nën presionin e kreditorëve të BE.
Edhe gazetarët dhe mediat kanë lënë punën, e kësisoj mbizotëron dhe një heshtje mediatike.
Karakteristikë e kësaj greve është edhe fakti që ajo mbështetet edhe nga një pjesë e strukturave partiake të Syrizës, që kanë bërë thirrje për pjesëmarrje masive të punëtorëve kundër “politikave neoliberale dhe shantazheve nga qendrat financiare dhe politike brenda dhe jashtë Greqisë”.
Të hënën, Greqia nuk arriti të bindte kreditorët e saj europianë që ka bërë mjaft për të siguruar këstin e parë prej 2 mld euro për nevojat e brendshme dhe 10 mld të tjera për rikapitalizimin e bankave. Ministrat e Eurozonës i kanë dhënë Athinës edhe pesë ditë të tjera afat që të vendosë për implementimin e reformave të nevojshme në këtë fazë.
