Partia Demokratike ka arritur të ruajë mandatin e katërt në qarkun e Lezhës pas një gare jashtëzakonisht të ngushtë me Partinë Socialiste. Me vetëm 70 vota diferencë, PD siguroi përfaqësimin e katërt në Kuvend nga ky qark, në një proces që u karakterizua nga tensioni, rivaliteti i fortë politik, por edhe në fund pranimi i rezultatit.
Sipas të dhënave zyrtare të Komisionit Qendror të Zgjedhjeve (KQZ), PD brenda vendit në qarkun Lezhë mori 29.483 vota, ndërsa PS 27.585 vota.
Ndërsa votat nga diaspora nuk ndryshuan rezultatin përfundimtar. Ato treguan një epërsi të ndjeshme për PS-në, e cila mori 5,714 vota, krahasuar me 4,041 vota të PD-së. Megjithatë, kjo nuk mjaftoi për të përmbysur avantazhin e PD-së brenda territorit.
Kjo garë në Lezhë vlerësohet si një nga më të ngushtat në zgjedhjet e 11 Majit, ku çdo votë ka pasur rëndësi vendimtare. Ruajtja e mandatit të katërt nga PD përbën një sukses strategjik për opozitën, duke i shtuar peshë përfaqësimit të saj në parlament.
