Ministri grek i Rendit ka deklaruar se dy avionët Kanadair që po operonin në jug të Shqipërisë, në vazhdim janë kthyer në territorin grek, për të luftuar me flakët në zonën e Follorinës.
Ministri i Rendit, Nikos Toskas, i deklaroi agjencisë zyrtare të lajmeve ANA-MPA, se, avionët kanë filluar operacionet në Shqipëri që në orën 07,15, duke hedhur ujë mbi vatrat e zjarreve, me qëllim që t’i shuajnë zjarret apo të pakësojnë intensitetin e tyre.
“Është shumë e vështirë, sepse zjarret janë në terren malore dhe ka pak mundësi për koordinim të mirë me forcat tokësore”,ka thënë ministri Toskas.
Sipas tij, ka dhe një arsye tjetër “serioze”, që motivon asistencën e Athinës me dy avionat zjarrfikës.
“Në atë zonë jeton minoriteti gek dhe pasuria natyrore që kanë ato fshatra”, ka thënë ministri Nikos Toskas.
Ai ka shtuar se planizimi i operacionit është bërë mbrëmjen e të enjtes, pasi qeveria vendosi dërgimin e dy avionave Canadair nga baza e Selanikut.
“Pasi të veprojnë për një kohë të gjatë në atë zonë, avionat do të shkojnë të ndihmojnë në operacionin e shuarjes së zjarrit në zonën e Follorinës”, ka përfunduar ministri grek i Rendit.
***
Shefi i ushtrisë greke ka urdhëruar tërheqjen e menjëhershme të avionëve grekë nga jugu i Shqipërisë.
Me një urdhër urgjent dhe pa asnjë sqarim të shefit të ushtrisë greke avionët “Canadair” janë larguar urgjentisht nga hapësira ajrore e Shqipërisë.
Sipas burimeve pranë Drejtorisë së Zjarrfikësve në Athinë, urdhëri u dërgua urgjent rreth orës 12.45, me orën lokale dhe menjëherë dy avionët kanë përfunduar operacionet e tyre në zonën e Bularatit, Muzinës, Dhrovjanit dhe Zervatit në jug të Shqipërisë, për t’u larguar drejt bazës së tyre në Elefsina, pranë Athinës.
Ndonëse situata në Greqi është e qetë dhe nuk ka fronte intensive zjarri, askush nuk e di arsyen përse shefi i ushtrisë greke ka vendosur braktisjen e operacioneve në vendin tonë, ku situata e zjarreve ka arritur kulmin, deklaruan burime pranë Drejtorisë së Zjarrfikësve për Top Channel.
Krahas kësaj, i sigurt tashmë është fakti që fronti i zjarreve në jug të Shqipërisë do të përkeqësohet. Pak ditë më parë ministri i Jashtëm shqiptar, Ditmir Bushati falenderoi Greqinë për ndihmën e dhënë në fikjen e zjarreve me avionët e saj në jug të vendit tonë. /b.d
