Parlamenti grek ka miratuar amendamentin për pezullimin e kërkesave të emigrantëve për azil për tre muaj.
Me 177 vota pro dhe 74 kundër, ky projektligj u lejon autoriteteve të riatdhesojnë në mënyrë të menjëhershme emigrantët e paligjshëm, pa ndonjë proces paraprak identifikimi.
Ky vendim është pritur me kritika nga partitë opozitare, të cilat e kanë cilësuar të paligjshëm. Edhe grupet e të drejtave të njeriut e akuzojnë Greqinë se po i dëbon me forcë azilkërkuesit.
Këtë vit, agjencia kufitare e Bashkimit Evropian tha se po shqyrtonte 12 raste të shkeljeve të mundshme të të drejtave të njeriut, gjë e cila mohohet nga qeveria greke.
Sipas kryeministrit grek, Mitsotakis, ky vendim vjen pas një rritje të numrit të emigrantëve të ardhur nga Afrika e Veriut.
“Përballë rritjes së ndjeshme të mbërritjeve të parregullta nga Afrika e Veriut, veçanërisht nga Libia në Kretë, ne kemi marrë vendimin e vështirë, por absolutisht të nevojshëm, për të pezulluar përkohësisht shqyrtimin e kërkesave për azil. Greqia nuk është një portë hyrëse në Evropë e hapur për të gjithë,” tha Kryeministri Mitsotakis.
Qeveria e Athinës bëri me dije se mijëra emigrantë të paligjshëm janë shpëtuar nga roja bregdetare greke pranë Kretës në ditët e fundit.
Qindra prej tyre, përfshirë edhe fëmijë, u strehuan përkohësisht në një qendër ekspozitash në Agyia, pranë qytetit të Hanias në Kretën perëndimore.
