Është tashmë i njohur konflikti mes vendeve fqinj të Greqisë dhe Maqedonisë në lidhje me emrin e kësaj të fundit. Por shteti helen, ka përfituar edhe nga ngjarjet e fundit në Kumanovë për “t’i treguar vendin” Maqedonisë.
Në një deklaratë për mediat, zëdhënësi i Ministrisë së Jashtme, Konstandin Kutras, është shprehur se edhe ngjarjet e ditëve të fundit kanë treguar se Maqedonia ka probleme serioze me demokracinë.
Kutras deklaratat i bëri duke iu përgjigjur pyetjeve të gazetarëve në lidhje me deklaratat e Presidentit të Maqedonisë, i cili tha se Greqia është përgjegjëse për bllokimin e integrimit euroatlantik të vendit.
“Për fat të keq, ringjallja e tensioneve në Maqedoni vërteton atë që kemi thënë në mënyrë të përsëritur; se në vendin tonë fqinj ka probleme serioze që lidhen me funksionimin e shtetit të së drejtës, respektimin e të drejtave të njeriut, implementimin e Marrëveshjes ndëretnike Ohrit, respektimin e parimit të marrëdhënieve të mira fqinjësore dhe probleme me demokracinë në vend.” tha ai
Zëdhënësi i MPJ greke kërkon që udhëheqja politike në Shkup t’i trajtojë uar këto çështje, duke demonstruar frymën e vetëkritikës në vend që të kërkojë ‘koka turku’, duke fajësuar të tjerët për bllokimin e perspektivës euroatlantike, të cilët Greqia e mbështet sinqerisht dhe në mënyrë të vendosur.
“Athina zyrtare shpreh keqardhjen dhe ngushëllimet për familjet e viktimave të krizës së fundit, duke shpresuar se bëhet fjalë për një fenomen të izoluar.” përfundoi zëdhënësi grek