Negociatat që po zhvilloheshin në Bruksel midis kreditorëve dhe Athinës, janë ndërprerë sërish të dielën në mbrëmje, pasi nuk ishte e mundur të gjendej një terren i përbashkët.
Sipas një komunikate për shtyp të Komisionit Europian, “ndërsa është shënuar një farë progresi, bisedimet nuk kanë arritur synimin e tyre dhe vazhdojnë mosmarrëveshje të rëndësishme midis projektit të autoriteteve greke dhe kërkesave të përbashlëta të KE, BQE dhe FMN… Përndryshe, propozimet greke mbeten të mangëta”, thuhet në njoftimin e Komisionit Europian, ku lihet të kuptohet pezmatimi i presidentit Juncker, nga sjellja e Athinës.
“Presidenti Juncker bëri një përpjekje të fundit të shtunën e të dielën që të gjendet një zgjidhje me kryeministrin Tsipras që do të lejonte përfundimin pozitiv të procesit, deri në takimin e ministrave të financave të eurozonës, të enjten, 18 qershor”.
“Presidenti Juncker mbetet i bindur se me forcimin e përpjekjeve reformuese nga pala greke dhe vullnetin politik nga të gjitha palët, mundet ende të gjendet zgjidhje deri në fund të muajit”, përfundon komunikata e KE.
Pas publikimit të komunikatës, nga Brukseli lëshoi një deklaratë për shtyp edhe kreu i grupit negociator grek dhe njëherazi nënkryetari i qeverisë, Janis Dragasakis.
Sipas tij, Athina paraqiti masa ekuivalente, mirëpo kreditorët “insistojnë që vakuumi financiar të mbushet ekskluzivisht me reduktimin e pagave e pensioneve si dhe rritjen e tatimit mbi vlerën e shtuar, që të dyja, në nivel 1% të GDP-së”.
Gjithsesi, Daragaskis thekson se grupi negociator grek “mbetet në gatishmëri për konkludimin e negociatave dhe arritjen e një marrëveshjeje me dobi reciproke”.
Athina, nga ana e vet, ia dedikon ndërprerjen e negociatave, siç thotë, kërkesave absurde dhe qëndrimin joelastik të kreditorëve.
Athina nuk do pranojë kurrë asnjë reduktim në pagat dhe pensionet, por as masa të tjera si rritja e TVSH-së në artikuj të përdorimit të përditshëm, si energjia elektrike.
Sido që të jetë, një dështim përfundimtar në arritjen e marrëveshjes, e shtyn Greqinë drejt falimentimit, por edhe daljes nga euro. Vendit i duhet të përballojë shpenzime të shtuara në tre muajt e ardhshëm, kryesisht pagesa ndaj kreditorëve, që deri në muajin shtator arrijnë në 10,2 miliardë euro. /Tribuna
