Ministri grek i Punës, Panos Skurletis theksoi sot se nëse negociatat me kreditorët e Athinës për zhbllokimin e një kësti të kredive nuk janë të suksesshme, do të duhet t’i drejtohemi popullit, që do të thotë, për zgjedhje të parakohshme.
Pyetur për mundësinë e një rikthimi në votime të zgjedhësve, që sollën në pushtet të majtën radikale në fund të muajit janar, ministri deklaroi për stacionin televiziv ”Mega” se kjo varet nga arritja ose jo e një marrëveshjeje me kreditorët BE dhe FMN të Greqisë.
“Nëse ne nuk arrijmë asgjë, theksoi se do të duhet t’i drejtohemi popullit (…) që të shprehë atë që dëshiron”, shtoi ministri që vazhdon të besojë se një kompromis do të mund të arrihet deri në fund të qershorit.
Një sondazh i kryer këtë fundjavë nga radio ”Parapolitika” favorizon partinë ”Syriza” të Aleksis Cipras duke avancuar gjerësisht me 45 për qind të votave ndaj konservatorëve të partisë Demokracia e Re, që morën 21,4 për qind të votave, në rast zgjedhjesh.
Më 30 qershor, Greqia do të duhet t’i rimbursojë FMN-në 1,6 miliardë euro nga kreditë, pas vendimit të saj për të mbledhur në fund të muajit katë pagesat që ajo duhet t’i bëjë në qershor institucionit në Uashington.
Sipas qeverisë greke, kryeministri, Aleksis Cipras, kancelarja gjermane, Angela Merkel dhe presidenti francez, François Hollande do të takohen të mërkurën në kuadër të një samiti kushtuar bashkëpunimit me shtetet latino-amerikane.
