Analistët në Kosovë, e shohin si ndërhyrje direkte në zgjedhje deklaratat e Grenell kundër kryeministrit Kurti. Megjithatë ata e shohin reagimin si rezultat të qasjes së Kurtit, që sic thonë nuk ka ditur të ruajë marrdhëniet me ndërkombëtarët. Ndjekim materialin e Tomor Avdias.
Sulmi që i dërguari i Trump për misione të posaçme, Richard Grenell i ka bërë kryeministrit Albin Kurti, vlerësohet si ndërhyrje direkte në procesin zgjedhor nga analistët në Kosovë.
Megjithatë politologu Albinot Maloku thotë se ky është një efekt bumerang për kryeministrin Kurti, që nuk ka ditur të ruajë raportet e mirë as brenda dhe as jashtë vendit.
“Në këtë moment kur kemi këtë deklarim të diplomatit Grenell në raport me atë që kryeministri Kurti në vazhdimësi nuk ka patur raporte të mira me SHBA, mund të merret kjo deklaratë si intervenim në procesin zgjedhor në Kosovë.”
Analistët e vënë theksin tek rëndësia e ruajtjes së marrëdhënieve të mira mes Kosovës aleatëve perëndimorë, në veçanti Shtetet e Bashkuara të Amerikës.
“Republika e Kosovës në asnjë mënyrë nuk duhet të kontribuoj me asgjë për shkërmoqjen e raportove me vendet aleate, posaçërisht me SHBA, që kanë qenë fuqizuesi, mirëmbajtësi, dizajnuesi i shtetit të Kosovës. Secila qeveri duhet të ketë parasysh se raportet me aleatët duhen të jenë të shenjta.”
Në atë që u konsiderua si sulmi më i fortë nga Uashingtoni në adresë të kryeministrit Kurti, Richard Grenell, i cili në administratën e parë Trump ka shërbyer si i dërguari i posaçëm i SHBA për dialogun, tha se komuniteti ndërkombëtar është i bashkuar kundër Kurtit, dhe se ky i fundit gënjen kur thotë se ka marrëdhënie të mira me administratën e re.
