Nënkryetari i Partisë së Pavarur Liberale (SLS) dhe zëvendësministri i Ministrisë së Punës dhe Mirëqenies Sociale në Qeverinë e Kosovë, Boban Stankoviç, është rrahur në orët e para të mëngjesit të së mërkurës para shtëpisë së tij në Graçanicë nga një grup personash dhe nga arsye të panjohura tani për tani, transmeton Koha.net.
Por, partia e tij thekson se “kemi arsye të dyshojmë dhe të brengosemi nga fakti se para dhjetë ditësh persona të panjohur në oborrin e shtëpisë së Stankoviçit i helmuan dy qenë race të zgjedhur”. Policia në Graçanicë, ka konfirmuar rastin, por nuk kanë dhënë hollësi të tjera e as motivet e kësaj rrahjeje.
Ndërsa Policia e Kosovës ka konfirmuar se në orën 02:30 të datës 8 mars në Graçanicë janë përfshirë në një rrahje gjashtë persona, tre prej të cilëve janë shoqëruar në polici.
Koha.net merr vesh se njëri prej tre të dyshuarve është vetë zëvendësministri Stankoviç, i cili më vonë është liruar me procedurë të rregullt.
Boban Stankoviç ka qenë edhe ministër për kthim dhe Komunitete në Qeverinë e Kosovës.
Ndërsa mediat në gjuhën serbe duke njoftuar për këtë ngjarje, theksojnë se “atë e rrahu një grup huliganësh, të cilët i shkaktuan lëndime të rënda trupore”. (b.an)
