Ditën e djeshme u raportua për një tentativë për grabitje në një kazino në kryqëzimin e “21 Dhjetorit” në Tiranë. Kjo grabitje ka qenë tamam si një skenë filmi humoristik, pasi ajo që i ka ndodhur grabitësit të supozuar ka qenë me të vërtetë epike.
Një ngjarje e tillë nuk ka ndodhur më përpara në Shqipëri. Ditën e djeshme rreth orës 13:30 një djalë i ri mësyu me pistoletë lodër kazinonë për të grabitur shumën e parave që ishte mbledhur deri në ato momente.
Fillimisht, dukej se gjithçka po shkonte mirë, por kjo gjë nuk zgjati shumë. Në momentin e ikjes, autorit i çahet pistoleta në dysh dhe goglat e saj përhapen në dysheme.
Pati nga ata klientë që u shkrinë gazit nga kjo skenë, ndonëse kishin humbur shuma të mëdha parash në kazino” -thanë burimet policore, raporton gazeta Shqip.
Në momentin kur ndodhi ngjarja, në kazino kishte shumë pak klientë, të cilët të përqendruar në lojën e tyre, nuk e kishin kuptuar se çfarë po ndodhte. Situata ishte qartësuar vetëm në momentin kur në ambientet e biznesit u futën forcat policore, të lajmëruar nga punonjësit. Sipas tyre, mësohet se shuma e marrë nga autori i ngjarjes varion nga 10 deri në 20 mijë lekë të vjetra, ndërsa po përllogaritet vlera e saktë./a.m.
