Grabitja në aeroportin e Rinasit ka qenë në qendër të diskutimeve gjatë mbledhjes së sotme të grupit parlamentar të Partisë Socialiste.
Burime të news24 brenda grupit bëjnë të ditur se ministri i Brendshëm Tahiri ka informuar deputetët lidhur me reagimin e policisë pas ngjarjes. Sipas ministrit, policia u njoftua me vonesë.
Ndërkohë deputeti Pirro Lutaj kritikoi deklaratat e deputetit të LSI-së Luan Rama në Komisionin e Sigurisë, ku tha se shteti duhet të reagojë lidhur me vjedhjen e parave në aeroport. Sipas deputetit Lutaj, “më i moderuar sot në komision ishte Flamur Noka sesa Luan Rama”.
Nga ana e tij, deputeti Paulin Stërkaj tha: “T’ia lemë hetimit të merret me ngjarjen e Rinasit. Shqetësim për atë që ndodhi. Ndoshta janë plane të njerëzve që lidhen me bankat. Është i treti rast që grabiten bankat, duhet hetim i thellë”.
Ndërkohë kreu i grupit të socialistëve, Gramoz Ruçi u tha deputetëve të thellohen në kontratën koncesionare dhe të informohen mirë se kush është përgjegjës për sigurinë në aeroport.
