Ka rezultuar e gjitha një histori e sajuar ngjarja e raportuar në mesditë për grabitjen dhe plagosjen e një vajze me thikë. Gjithçka ishte e sajuar pikërisht nga shtetasja e cila bëri denoncimin në Polici, 29-vjeçarja me inicialet J.F.
Pas kryerjes së veprimeve hetimore nga Policia e Tiranës, rezulton se vajza e sajoi gjithçka, për të shmangur pagesën e një borxhi që u kishte prindërve të saj.
Sipas të dhënave, shtetasja e arrestuar tashmë nga Policia për kallëzim të rremë, i kishte premtuar të atit se do ti kthente paratë që i kishte borxh (3 milion lekë të reja), dhe do të merrte një kredi.
Në momentin që prindërit vijnë për të marrë paratë, ajo nuk i kishte ato.
Dhe për të bërë të gjithë inskenimin të besueshëm se ishte sulmuar, vajza gërvisht veten në dorë me një thikë. Ajo kishte deklaruar para prindërve dhe policisë se u grabit dhe u godit me thikë nga një person i panjohur.
Por, në fund gjithçka u zbardh nga Policia dhe vajza u prangos.
