Një familje ka kaluar momente tmerri gjatë natës në Shkodër teksa grabitës të armatosur hynë në banesë.
Nga ngjarja ka mbetur i plagosur i zoti i shtëpisë.
Policia thotë se shtetasit Pllumb Kolbuçaj 45 vjeç, banues në lagjen “Guerile” dhe Abdullah Hardhiçaj, 53 vjeç, banues në lagjen “Ahmet Haxhija”, Shkodër, bashkë me një tjetër kanë hyrë në një banesë për të vjedhur.
Ata akuzohen se së bashku me një person tjetër, kanë tentuar të vjedhin me dhunë banesën e Agron Veselit 62 vjeç, pranë shkollës “Ismail Qemali”, me të cilin janë konfliktuar fizikisht, duke i shkaktuar dëmtime.
Gjithashtu është identifikuar edhe autori i tretë i cili u shpall në kërkim shtetasi F. Sh., 20 vjeç, banues në Shkodër.
Ishin fqinjët e Veselit ata që dëgjuan zhurmat dhe thirrjet për ndihmë duke lajmëruar policinë.
Pas sinjalizimit për ngjarjen, efektivët e policisë u vunë në ndjekje të të dyshuarve, duke arrestuar Kolbuçaj pranë banesës, ndërsa Hardhiçaj pak minuta më vonë.
Dy të dyshuarve në momentin e arrestimit ju gjet maska, doreza, dhe një levë hekuri të cilat u sekuestruan në cilësinë e provës materiale. Aktualisht vijojnë hetimet për dokumentimin e plotë të kësaj ngjarje./a.m.
