Një 33-vjeçar është futur në telashe me drejtësinë, teksa është munduar të ndalë një hajdut.
Ai tashmë është dënuar me 4 vjet burgim nga Gjykata e Tiranës për veprën penale “plagosje e rëndë me dashje”. Bëhet fjalë për shtetasin L.E., i cili do të kryejë 2 vjet e tetë muaj burgim, pasi ka përfituar nga gjykimi i shkurtuar. Sipas vendimit të Gjykatës së Tiranës, dhënë më 16 tetor të këtij viti, i pandehuri e ka dhunuar aq keq hajdutin, sa atij i është dashur të heqë shpretkën në Spitalin Ushtarak.
Ka nisur më datën 2 mars 2017, rreth orës 11:00 në rrugën “Prokop Mima” në Tiranë. Shtetasi E.N., që në këtë rast është viktima, është afruar në dyqanin e shtetases D.D., motra e të pandehurit. Ai ka marrë vjedhurazi nga dyqani pesë banane dhe më pas është larguar me shpejtësi drejt rrugës “Robert Shvarc”.
Të gjitha veprimet që ai ka kryer janë pikasur nga vëllai i shtetases D.D., i cili e ka ndjekur hajdutin nga pas. Sipas dosjes së Prokurorisë, pasi L.E. e ka arritur hajdutin, ai ka nisur të debatojë me të verbalisht dhe më pas ky konflikt u kthye në fizik. Banorët e zonës kanë njoftuar Policinë. Shtetasi E.N. u dërgua menjëherë në Spitalin Ushtarak ku iu nënshtrua një ndërhyrje kirurgjikale, e cila përfundoi me heqjen e shpretkës për shkak të dëmtimeve të mëdha. Në këto kushte, Policia nisi procedimin penal të vëllait të shitëses, shtetasit L.E., i cili u akuzua për “plagosje të rëndë me dashje”.
DËSHMIA E SHITËSES
Në deklarimet e saj në Prokurori, shtetasja D.D. deklaroi se më datë 2 mars, rreth orës 11:00, në mjediset e dyqanit ku ajo punon, ka shkuar një shtetas, i cili ka vjedhur një tufë bananesh tek arka që ajo kishte nxjerrë jashtë dyqanit dhe është larguar menjëherë me shpejtësi për nga ura e zonës së “Kodrës së Diellit”. Vëllai i saj, i pandehuri L.E., e ka ndjekur nga pas dhe ata janë përfshirë në një konflikt të dhunshëm fizik. Ajo ka deklaruar se ka qenë afër ngjarjes dhe se nuk ka pasur mundësi që t’i ndajë. D.D. ka deklaruar se pas ngjarjes është takuar me të vëllanë te dyqani, i cili i ka thënë se e kishte mbyllur “problemin”.
DËSHMIA E HAJDUTIT DHE TË PANDEHURIT
Shtetasi i dëmtuar, E.N., ka thënë në deklarimin e tij se më 2 mars ka qenë te “Komuna e Parisit” në një dyqan dhe ka marrë pa paguar 5 banane për t’i ngrënë. Ai është larguar nga dyqani, por pas disa metrash është ndaluar nga shtetasi L.E., i cili i kishte kërkuar llogari për veprimin që kishte kryer.
Ai ka deklaruar se është goditur me shqelma dhe grushte duke u rrëzuar më pas në tokë, ndërsa i pandehuri, në deklarimet e tij në Prokurori, ka thënë se kishte parë hajdutin t’i merrte pesë banane nga dyqani i motrës dhe vendosi ta ndiqte. Pasi e ka arritur, ai ka debatuar me personin në fjalë, por sipas tij është ofenduar dhe goditur prej tij.
Nga ky moment, i pandehuri ka deklaruar se është përleshur me hajdutin derisa ai është rrëzuar në tokë. Pas këtij momenti, L.E. është larguar nga aty. Me gjithë përpjekjet e L.E. për të ndryshuar kualifikimin e veprës penale, Gjykata e ka refuzuar këtë kërkesë, duke e kualifikuar si “plagosje e rëndë me dashje” dhe e ka dënuar në përfundim me 2 vjet e 8 muaj burgim. Vuajtja e dënimit për të pandehurit do të kryhet në një burg të sigurisë së zakonshme./panorama
