Policia ka finalizuar operacionin “Mekanizmi”, duke arrestuar autorin e dyshuar të disa vjedhjeve me dhunë.
Një 32-vjeçar nga Fushë Kruja ka përfunduar në pranga, pasi gjatë muajit mars 2025 dyshohet se u kishte grabitur me dhunë varëset e floririt tre grave në Vorë dhe Kamëz.
Pas kallëzimeve nga tre persona, viktima të grabitjeve, Komisariati i Policisë Nr. 7 ndërmori një sërë veprimesh hetimore dhe operacionale, duke arritur të identifikojë dhe lokalizojë autorin e dyshuar Florid Ceku.
“Gjatë operacionit u mundësua identifikimi, lokalizimi dhe vënia në pranga e autorit të dyshuar të këtyre vjedhjeve, shtetasi F. C., 32 vjeç, banues në Fushë Krujë. Punohet për zbardhjen e vjedhjeve të tjera që mund të ketë kryer 32-vjeçari.”-thuhet në njoftimin e policisë.
Policia po vijon hetimet për të zbardhur nëse 32-vjeçari është i përfshirë edhe në vjedhje të tjera. Materialet procedurale i janë referuar Prokurorisë së Tiranës për veprime të mëtejshme.
