Tre vlonjatë janë arrestuar mëngjesin e sotëm në Bari të Italisë, pasi u kapën në flagrancë duke transportuar me gomone një sasi të konsiderueshme lëndë narkotike, të llojit kanabis sativa. Gomonia 10 metra e gjatë, me 1650 kg kanabis në bord, është kapur në Bari rreth orës 04:00 të mëngjesit.
Mësohet se dy trafikantët dhe drejtuesi i gomones kanë tentuar t’i shpëtojnë policisë duke u hedhur në det, por roja bregdetare italiane ka bërë të mundur arrestimin e tyre. Identiteti i shqiptarëve nuk bëhet i ditur, por mësohet se të tre janë nga Vlora. Operacioni është zhvilluar nga roja bregdetare italiane, në bashkëpunim me policinë shqiptare.
