Reporterit për Shqipërinë, Knut Fleckenstein ju desh të debatonte me eurodeputetë neo-nazistë për çështjen e vetos greke në lidhje me procesin e integrimit të Shqipërisë.
Është hera e dytë brenda pak ditëve që eurodeputeti grek, Jorgos Epitideios, i cili është zgjedhur prej partisë neo-naziste, “Agimi i Artë” kërcënon me veto Shqipërinë për hapjen e bisedimeve për anëtarësimin në Bashkimin Europian.
Jorgos Epitideios është gjeneral-lejtnant në pension. Ai mban kontakte të mëdha me përfaqësues të minoritarëve grekë në Shqipëri.
Është zgjedhur eurodeputet më 2014 i Agimit të Artë dhe merr pjesë në çdo aktivitet për autonominë e Vorios Epirit. Disa herë eurodeputeti Jorgos Epitideios është parë në shoqërinë e ekstremistëve grekë që frymojnë për aneksimin e Jugut të Shqipërisë. Ai ka marrë pjesë në paradën që organizon shoqata ekstremiste “Autonomia e Vorio Epirit”, e cila drejtohet nga Babis Krathanos.
Ndërkohë fotot që përmban ky shkrim vërtetojnë veprimtarinë irredentiste të eurodeputetit grek, i cili kërkon bllokimin e bisedimeve për anëtarësimin e Shqipërisë në Bashkimin Europian. (Arben Llalla)
