Në një kohë kur Facebook dhe dy platformat e saj Instagram dhe WhatsApp “ranë” në shumë vende të botës, gjiganti i mediave sociale thekson se po punon për të zgjidhur problemin. Kompania, e cila ende nuk ka shpjeguar se çfarë mund të ketë shkaktuar “ndërprerjen” globale, po përballet me një krizë të madhe orët e fundit pasi një ish-punonjëse e akuzoi se ka promovuar gjuhën e urrejtjes dhe keqinformimit në këmbim të fitimit.
Francis Hogen tha se platforma “tradhtoi demokracinë” dhe se ajo kishte prova në formën e dokumenteve të brendshme dhe studimeve që qarkullonin brenda kompanisë, të cilat ajo i dorëzoi në Wall Street Journal. Ajo thotë se kompania e Mark Zuckerberg e dinte mirë që urrejtja, dhuna dhe lajmet e rreme po lulëzonin në platformat e saj, por nuk po bënte asgjë për t’i ndaluar ato, pasi kjo do të zvogëlonte kohën që përdoruesi shpenzon për “produktet” e tij.
“Ajo që pashë në Facebook vazhdimisht ishte se kishte një konflikt interesi midis asaj që është e mirë për publikun dhe asaj që është e mirë për Facebook. Facebook ka zgjedhur vazhdimisht t’i shërbejë interesave të veta, të tilla si të fitosh më shumë para,” tha Hogen për 60 Minutes. “Versioni i Facebook që ekziston sot po copëton shoqëritë tona dhe po shkakton dhunë etnike në të gjithë botën,” tha ajo. /abcnews.al
