Ushtria ruse nisi përsëri sulme të rënda ajrore mbi Ukrainën gjatë natës të së martës. Kryetari i bashkisë së Kievit, Vitali Klitschko, reagoi në Telegram duke folur për një “sulm masiv ndaj kryeqytetit” që po vazhdon dheu bëri thirrje banorëve të Kievit të qëndrojnë në strehimoret e tyre.
Të paktën një person u raportua i vdekur dhe katër të tjerë u plagosën në Odessa. Shefi i Shtabit të Presidentit të Ukrainës, Andriy Yermak, bëri thirrje për sanksione të mëtejshme kundër Rusisë pas sulmeve.
Në qendër të kryeqytetit ukrainas, një gazetar i AFP dëgjoi të paktën një duzinë shpërthimesh, si dhe tingujt e zjarrit kundërajror dhe zhurmën e dronëve. Kryetari i bashkisë së Kievit, Klitschko, shtoi në një postim të mëvonshëm në Telegram se “një grup i ri UAV-ësh (dronësh) po fluturon drejt kryeqytetit”.
Sipas raportimeve, të paktën shtatë lagje në Kiev u prekën nga sulmet. Katër persona u plagosën në sulme, ndërsa shtëpive dhe makinave iu vu flaka.
Sipas guvernatorit rajonal Oleh Kiper, i vdekuri në Odessa ishte një 59-vjeçar i cili u vra në sulme ndaj ndërtesave të banimit. Sipas Kiper, sulmet ruse në qendër të qytetit jugor ukrainas, i cili është pjesë e Trashëgimisë Botërore, goditën gjithashtu një repart materniteti dhe një qendër mjekësore emergjente.
Pas sulmeve të reja, këshilltari presidencial ukrainas Yermak akuzoi Rusinë se gënjen dhe i bëri thirrje Perëndimit të ndërmarrë veprime. “Rusia gënjen çdo ditë për dëshirën e saj për paqe dhe sulmon njerëz çdo ditë”, deklaroi ai në Telegram. “Është koha për të vendosur sanksione. Është koha për të mbështetur Ukrainën me armë.”
Yermak tha më tej se ishte koha “që të gjithë më në fund të pranojnë faktin se Rusia kupton vetëm goditjet dhe jo fjalët e arsyeshme”, tha Yermak të martën, duke iu referuar administratës amerikane të Presidentit Donald Trump.
