Autoritetet italiane kanë zbuluar një skemë e re për kalimin drejt SHBA-së nga shqiptarët. “Umbria24” raporton se për futjen ilegale në Shtetet e Bashkuara të Amerikës çmimi shkon në 20 mijë dollarë.
Në fillim pagusheshin 10 mijë dollarë pasi merreshin pasaportat false dhe biletat e avionit, ndërsa pjesa tjetër pas mbërritjes në SHBA, Kanada apo edhe Britani të Madhe.
Si pjesë e operacionit “Overtime”, policia italiane në Peruxhia në bashkëpunim me policinë kufitare amerikane, kanë shkatërruar grupin italo-shqiptar të shtrirë në tre shtete Shqipëri, Itali e SHBA.
Autoritetet italiane kanë vërtetuar se në territorin amerikan kanë hyrë 36 shqiptarë me pasaporta false falë këtij grupi.
Nën pranga janë vënë 3 persona: shtetasi shqiptar P.P 37 vjec e dy italianë 47 e 44 vjeç. Policia italiane ka treguar dhe rolin e shqiptarit në këtë grup. Ai siguronte pasaportat, të cilat rezultojnë të vjedhura apo të falsifikuara. Ky grup kriminal kishte disa baza logjistike në Shqipëri.
Që prej vitit 2013 me anë të një agjencie turistike në pronësi të shtetasve italianë, ata organizonin udhëtime të shtetasve shqiptarë drejt Amerikës, Kanadasë e Britanisë së Madhe. Disa herë pagesa kryhej me këste e në raste vonese kërcënoheshin me dhunë familjarët e personave.
